Moldova Sosialist Partiyası müxalifəti hökumət əleyhinə etirazlara qoşulmağa çağırıb.
Medialive xəbər verir ki, bu çağırışı partiya sədri İqor Dodon Əmək və Əhalinin Sosial Müdafiəsi Nazirliyinin qarşısında keçirilən nümayişdə səsləndirib.
“Digər müxalifət qüvvələrinə müraciət etmək istəyirəm, gəlin səylərimizi birləşdirək. Görün nə qədər dövlət qurumları xalqın ehtiyaclarına məhəl qoymurlar. Belə aksiyaları tez-tez keçirək xalqa xidmət etməyən qurumların binaları qarşısında. Söz verirəm: növbəti dəfə partiya bayraqları olmadan yürüş edəcəyik. Qoy hamı gəlsin. Gəlin birlikdə xalq üçün ədalət tələb edək”, – deyə Dodon bildirib.
“Təsadüfi deyil ki, bu gün [etiraz aksiyasına] bu nazirlikdən başlayırıq. Bu nazirlik dövlətin sosial siyasətinə cavabdehdir. Digər hökumət binalarında da piketlər keçirəcəyik. Lazım gələrsə, nazirə də baş çəkəcəyik. Əminəm ki, çoxunuz bizi dəstəkləyəcək”, – siyasətçi qeyd edib.
Yüzə yaxın insan əllərində “Sosial təminat qənaət yeri deyil”, “Yardımı kəsməyin – insanlar donur” və “Lənət olsun hökumətə” şüarları səsləndirən bannerlərlə aksiyada iştirak edib. Polis aksiyaya müdaxilə etməyib.
Qeyd edək ki, Moldova yüksək qaz və elektrik enerjisi qiymətlərinə görə iqtisadi böhran yaşayır. Ölkədə məişət istehlakçıları hazırda 1000 kubmetr qaz üçün təxminən 860 avro ödəyirlər. Müxalifət böhranın səbəbini Rusiya ilə qarşıdurma kursu aparan və “Qazprom”la əlaqələri kəsən qərbyönümlü hökumətdə görür.
