“Dünən keçirilən buraxılış imtahanındakı sualların çətin olması bəzi repetitor müəllimlər, eləcə də abituriyentlər tərəfindən dilə gətirilir. Burada sanki bizim müəllimlərdə, abituriyentlərdə fikir formalaşıb ki, Dövlət İmtahan Mərkəzi məhz mövcud test bazarında olan test topluları, sinif testləri, yaxud təşkilatlar tərəfindən nəşr edilən vəsaitlərdə olan tapşırıqlar qəbula da salınacaq. Bu, doğru yanaşma deyil”.
Bu sözləri Medialive.az-a açıqlamasında təhsil eksperti Elçin Əfəndi deyib.
O, ötən gün keçirilən 11-ci sinif üzrə buraxılış imtahanında yer alan sualların səviyyəsini qiymətləndirib:
“DİM hər il test bazarını yeniləyir, tapşırıqlar dəyişir, köhnə təqdim edilən suallar üzərində dəyişiklik edilir. Hətta aşağı siniflərdə yer alan bəzi tapşırıqlar var ki, onlar dünən imtahanda öz əksini tapıb. Bir sözlə, imtahana Elm və Təhsil Nazirliyinin tam orta təhsil müəssisələrində nəzərdə tutulan tədris planından və proqramından kənar sual salınmayıb. Qaldı ki, sualların düşünməyə əsas yaratması məsələsinə. Əlbəttə ki, məntiqi suallar və düşünülməsi bir qədər vaxt aparan suallar da var. Bu tip suallar imtahana qeyri-ciddi hazırlaşan abituriyentlər üçün çətinlik səviyyəsinin artmasına gətirib çıxarır. Lakin, ümumilikdə suallar 3 bölgü prinsipi əsasında hazırlanıb. Sadə, orta və çətin”.
Ekspert qeyd edib ki, dünənki imtahanda iştirak edən abituriyentlərin fikirləri müsbət olub:
“Nəzərə alsaq ki, bu il 11-ci sinifi bitirərək imtahan verən məzunlar iki il öncə 9-cu sinifdə imtahan vermişdilər. Həmin məzunların 26-ı nəfəri 9-cu sinifin buraxılışında 300 bal toplayıblar. Biz hazırda imtahan nəticələrini gözləyirik. Nəticələr elan edildikdən sonra vəziyyətə baxacağıq. 58 min 138 nəfərin imtahanda iştirak etməsi nəzərdə tutulurdu. Bunların arasında imtahandan narazılıq edənlər olacaq, razılıq verənlər də olacaq. İmtahana uğurla hazırlaşaraq iştirak edən bəzi abituriyentlərin də fikirlərini öyrənmişik. Onlar bildiriblər ki, Xarici dil sualları çox asan, Azərbaycan dili də həmçinin asan, riyaziyyatdn isə açıq suallarla bağlı tərəddüd edirlər. Çünki bu tip suallar abituriyentlərin zamanını xeyli alır. Lakin ümumilikdə suallara cavab veriblər. İmtahan iştirakçıları yalnız bölgələr üzrə dinləmə mətnlərində texniki nasazlığın olduğunu qeyd ediblər”.
E.Əfəndi sonda növbəti buraxılış imtahanında iştirak edəcək abituriyentlərə uğurlar arzulayaraq onların imtahana ciddi yanaşmasını tövsiyə edib:
“Növbəti buraxılış imtahanı martın 15-də keçiriləcək. Bildirmək istəyirəm ki, bu imtahana da abituriyentlər ciddi hazırlaşsınlar. Dünən imtahanda yer alan suallarla tanış olsunlar. Bu məsələdə abituriyentlərin çətin imtahan prosesinə öyrədilməsi vacibdir. Onları asan istiqamətdə sınaqlara göndərmək, daha çox vacib və çətin tapşırıqları həll etməyə sövq etməmək, nəticədə imtahanda dəyişik tapşırıqları doğru icra edə bilməmələrinə səbəb olur”.
Leyla Cəfərova
