Bu ölkə iki müharibə yaşadı. Birinci müharibədə üzləşdiyimiz məğlubiyyəti ikinci müharibədə dəyişdirə, ərazi bütövlüyü və suverenliyimizi bərpa edə, Qarabağ yarasını sağalda bildik. Bunu Azərbaycan xalqı, bu xalqın ordusu və bu ordunun Ali Baş Komandanı İlham Əliyev etdi.
Birinci və ikinci müharibənin arasındakı üç onillik qədər müddətdə Azərbaycanın üzləşdiyi ən böyük humanitar problemlərdən biri məcburi köçkünlərlə bağlı idi. Evi, yurdu işğal edilərək dağılmış və bu işğal nəticəsində məcburi köçkün düşmüş yüz minlərlə insanın həyatını təmin etmək asan deyildi, xüsusilə müharibədən yeni çıxmış, iqtisadi imkanları məhdud bir ölkə üçün. Lakin dövlət bu problemin öhdəsindən layiqincə gəldi. Məcburi köçkün vəziyyətinə düşən vətəndaşlarımızın ev və sosial müdafiə ilə təmin edilməsi reallaşdırıldı və torpaqlarımız işğalda olduğu dövrdə bu qayğı ildən-ilə daha da artdı. Ən əsası isə yurdlarını itirmiş bu insanların ümidsizliyə qapılmasına imkan verilmədi.
Ali Baş Komandanın hər zaman dediyi kimi, bir gün torpaqlarımızın azad ediləcəyi ümidi daim saxlanıldı və nəhayət 2020-ci ilin 44 günlük Vətən savaşında bu hədəfə nail olduq. İndi azad olunmuş ərazilərə həyat qayıdır, yurdundan didərgin düşmüş vətəndaşlarımız üçün dövlət azad olunmuş torpaqlarda müasir standartlara uyğun evlər inşa edir.
Birinci Qarabağ müharibəsindən sonra məcburi köçkünlərimizi tək buraxmayan, daim onların qayğısına qalan dövlət ikinci Qarabağ müharibəsindən sonra da diqqətini onlardan əskik etmir.
Bu mənzərə fonunda Zəngilan rayon sakini Yaşar Cəfərov adlı birinin “müharibədə üzləşdiyim maddi və mənəvi zərəri dövlət kompensasiya olaraq ödəməlidir” deməsi həqiqətən absurd görünür. Təkcə ona görə yox ki, dövlət məcburi köçkünlərə bu müddətdə “kompensasiyadan” yüzlərlə dəfə çox vəsait ödəyib, həm də ona görə ki, Yaşar Cəfərovun evini, mülkini, yurdunu Ermənistan dağıdıb, o isə kompensasiyanı Azərbaycandan tələb edir.
Bu şəxs deyir ki, torpaqlar işğal ediləndə onun evi, mal-qarası, əkin sahəsi vardı, eyni zamanda, 30 il ərzində “bizə maddi-mənəvi ziyan” vurulub və bütün bunların hamısı kompensasiya olaraq dövlət tərəfindən verilməlidir.
Birincisi, Yaşar Cəfərov da daxil olmaqla bütün məcburi köçkünlərin evini, yurdunu Ermənistan dağıdıb, mal-qarasını talayıb, Azərbaycan dövləti yox.
İkincisi, 30 il ərzində məcburi köçkünlərə maddi və mənəvi zərəri də Ermənistan vurub, Azərbaycan dövləti yox.
Üçüncüsü, Azərbaycan dövləti məcburi köçkün vəziyyətinə düşən vətəndaşlarının 30 il ərzində hər şeylə təmin edib, ev verib, sosial müdafiəsini təşkil edib, bir sıra imtiyazlar tanıyıb ki, yurdlarından, yuvalarından uzaq düşmüş bu insanlar əziyyət çəkməsin.
Yaşar Cəfərov adlı şəxs isə bütün bunları görməzdən gələrək, ona və bütün məcburi köçkünlərə maddi-mənəvi zərər vuran Ermənistandan yox, Azərbaycan dövlətindən şikayətlənir. Əslində, bu şəxsin sıradan fiqur olduğu, onun iddia və ittihamlarının məqsədyönlü şəkildə dövlətin işini kölgələmək məqsədi daşıdığı aydındır. Çünki bu şəxs 44 günlük müharibənin davam etdiyi vaxt da dövləti qaralayan çıxışlar edirdi, daha doğrusu, onu danışdırırdılar. Kimlərin danışdırdığı da sirr deyil, bunu Yaşar Cəfərovun çıxış etdiyi platformalara baxanda aydın görünür.
Həmçinin, bunu məcburi köçkün həyatı yaşamış, hazırda azad olunan torpaqlara qayıdan və qayıtmaq növbəsini gözləyən vətəndaşlarımız da yaxşı görür. Ona görə də Yaşar Cəfərovun bu çıxışına reaksiyalar kifayət qədər sərt və yerində oldu. İnsanlar onun ittihamlarını iyrənc və şəxsi mənfəət kimi qiymətləndirir, dövlətin son 30 ildə verdiyi dəstəyin kifayət qədər olduğunu bildirir, Yaşar Cəfərovu isə ədalətli və vicdanlı olmağa dəvət edirlər. Haqlıdırlar. Çünki Yaşar Cəfərovun iddiaları və ittihamlarının ünvanı Azərbaycan dövləti yox, Ermənistan olmalıdır. Ermənistanın törətdiyi əməllərə görə Azərbaycan dövlətindən “kompensasiya” tələb etmək, ümumiyyətlə bu məsələni şouya çevirmək həqiqətən də yumşaq desək, nankorluqdur və arxasındakı art niyyət aydın görünür.
Bu bir məsələni yenidən aktuallaşdırdı. Qaçqın düşərkən itirdiyini dövlətdən tələb etmək, vuruşmaqdan, müharibə veteranı olmaqdan, şəhid ailəsi olmaqdan şəxsi mənfəət güdmək olmaz. Yaşar Cəfərovun yeganə məqsədi şəxsi mənfəət qazanmaqdır, onu ortaya atanlar isə dövlətə qarşı qarayaxma cəhdləri edir. Lakin bütün bu cəhdlər boşboğazlıqdan başqa bir şey deyil.
Vasif Həsənli
Demokrat.az xəbər portalının baş redaktoru
