Məlum olduğu kimi, Türkiyənin “Fənərbaxça” klubu Çempionlar Liqasının ikinci təsnifat mərhələsində Polşanın “Qornik Zabrze” komandası ilə qarşılaşacaq.
Medialive.az xəbər verir ki, “Fənərbaxça” klubunun vitse-prezidenti Barış Göktürk Çempionlar Liqası matçı ilə bağlı Türkiyənin “HT Spor” idman telekanalına açıqlama verib.
“Çempionlar Liqasında asan oyun yoxdur. Komandamıza güvənirik. İnanırıq ki, mərhələni keçəcəyik. “Fənərbaxça” üçün rəqibin əhəmiyyəti yoxdur. Hər komandanı məğlub etməyə borcluyuq” – deyə Göktürk bildirib.
Vitse-prezident qeyd edib ki, “Fənərbaxça”nın Dünya Çempionatında çıxış edən futbolçuları var və “Qornik Zabrze” klubu ilə oyuna çıxa bilməyəcəklər:
“Dünya Kubokunda bəzi oyunçularımız var. Onlar, ehtimal ki, ilk oyuna hazır olmayacaqlar, amma biz lazımi işləri görürük. Prezidentimizin əvvəllər verdiyi təlimatlara uyğun olaraq, transfer pəncərəsi açıldıqdan sonra komandanın əsasını formalaşdıracağıq. Düşünürəm ki, ilk oyuna qədər hazır olacağıq. Biz bundan keçməliyik və keçəcəyik“.
Transferlərlə bağlı heç bir gecikmə olmadığını bildirən Barış Göktürk bunları deyib:
“Türkiyə Futbol Federasiyası tərəfindən açıqlanan bir təqvim var. Transfer dövrü 22 iyunda başlayır. Transferlərimiz tamamlanacaq. Xüsusilə hücumçu xəttindəki boşluq aradan qaldırılacaq. Biz düzgün heyət planlaşdırması ilə “Fənərbaxça”nı Çempionlar Liqasında da daha irəli aparmaq istəyirik” – deyə Göktürk yekunlaşdırıb.
