Tanınmış plastik cərrah Mübariz Məmmədli haqqında tirajlanan informasiyalara münasibət bildirib.
O, bu barədə Medialive.az-a açıqlama verib.
Cərrah qeyd edib ki, yayımlanan məlumatlar həqiqəti əks etdirmir və birtərəflidir:
“Bildirmək istəyirəm ki, sertifikasiya şəhadətnaməmin ləğvi ilə bağlı qərarın qanuniliyi məhkəmə mübahisəsinin predmetidir və bu məsələyə yekun hüquqi qiymət hələ verilməmişdir. Buna baxmayaraq, bəzi media orqanlarında sanki məsələ tam həll olunmuş kimi təqdim edilir ki, bu da ictimaiyyətdə yanlış fikir formalaşdırır”.
M.Məmmədli bildirib ki, o, hazırda Azərbaycanda deyil, Avropada fəaliyyət göstərir:
“Hazırda mən Avropada plastik cərrah kimi peşə fəaliyyətimi davam etdirirəm və beynəlxalq tibbi tədbirlərdə, elmi konfranslarda və tədris proqramlarında iştirak edirəm. Peşəkar fəaliyyətim beynəlxalq səviyyədə davam etdiyi halda, Azərbaycanda həkimlərə qarşı aparılan qeyri-şəffaf və mübahisəli qərarlar ölkənin tibb sisteminin nüfuzuna mənfi təsir göstərir”.
Həkim vurğulayıb ki, məhkəmə prosesi hazırda davam edir və növbəti iclas iyunun 6-da keçiriləcək:
“Təəssüf ki, son illərdə yaranmış vəziyyət bir çox təcrübəli həkimlərin ölkədən kənarda fəaliyyət göstərməsinə səbəb olub. Əgər peşəkarların hüquqları qorunmasa və qərarlar şəffaf hüquqi əsaslarla qəbul edilməsə, Azərbaycan gələcəkdə də dəyərli tibbi kadrlarını itirmək riski ilə üzləşə bilər. Mən hüquqlarımın müdafiəsi üçün bütün qanuni vasitələrdən istifadə etməyə davam edəcəyəm və məhkəmənin obyektiv qərar verəcəyinə inanıram”.
Onu da əlavə edək ki, plastik cərrah “Baku Medical Plaza”da etdiyi qüsurlu əməliyyata görə pasiyentə 15 min manat ödədiyini də təkzib edib.
Qeyd edək ki, cərrahın sertifikasiya şəhadətnaməsinin ləğvi ilə bağlı ilk xəbəri Xitab24.az saytı yayıb.
