“Azərbaycandan Naxçıvana Ermənistan vasitəsilə kommunikasiyaların planlaşdırılmış şəkildə blokdan çıxarılması tənqidlərə səbəb olub, lakin həll yollarına müraciət etmək vacibdir”.
Medialive Ermənistan mediasına istinadən xəbər verir ki, bu sözləri noyabrın 5-də İrəvanda keçirilən “Orbeli 2025” beynəlxalq forumunda iranlı politoloq Vəli Kaleci deyib.
O əlavə edib ki, potensial yol Ermənistan və İran arasında ortaq sərhəddən keçəcəyi üçün Tehran üç təklif irəli sürüb.
Kaleci bildirib ki, İran bu potensial yolun sərhəddən mümkün qədər uzaqda, Ermənistan-İran sərhədinin şimalındakı Sünik bölgəsində tikilməsini gözləyir.
“Bundan başqa, İran yolun Ermənistanla mövcud yol əlaqələrini pozmayacağını və ya İran yüklərinin tranzitinə mane olmamasını gözləyir. Bu məqsədlə üç körpü tikilə bilər: biri Qarsla əlaqəni təmin edəcək, ikincisi dəmir yolu, üçüncüsü isə qaz və neft kəmərləri, həmçinin elektrik xətləri və kabellər üçün. Bu yanaşma İranın narahatlığını azalda bilər”, – ekspert vurğulayıb.
