Aİ liderləri Amerika planının 28 bəndindən bəzilərini qəbuledilməz hesab edirlər.
Medialive xəbər verir ki, bu sözləri Polşanın baş naziri Donald Tusk Aİ-nin Luandada Ukrayna üzrə qeyri-rəsmi sammitində deyib.
“Avropa liderləri arasında təqdim olunan 28 bənd üzərində işləmək üçün razılıq var, amma bəziləri qəbuledilməzdir”, – deyə baş nazir qeyd edib.
Polşanın baş naziri aydınlıq gətirib ki, Avropa liderləri Ukrayna Silahlı Qüvvələrinin sayının azaldılması ilə bağlı bənddən razı deyillər. Tusk özü də Rusiyaya qarşı sanksiyaların davam etdirilməsinin vacibliyini vurğulayıb.
Baş nazir onu da qeyd edib ki, Kiyevin təhlükəsizliyinə zəmanət kimi NATO qırıcılarının Polşaya yerləşdirilməsinə dair bənd plandan çıxarılıb.
Qeyd edək ki, noyabrın 24-də Luandada Aİ-Afrika İttifaqı sammiti çərçivəsində Avropa liderlərinin Ukrayna üzrə qeyri-rəsmi görüşü baş tutub. Əsas mövzu ABŞ-nin təqdim etdiyi Rusiya-Ukrayna münaqişəsi üzrə 28 bəndlik sülh planı olub.
