Bakıda yerləşən “Karaca” mağazalar şəbəkəsinin 28 Mall filialından şikayət var.
Yeniera.az-a müraciət edən şikayətçi bildirib ki, 9 aprel tarixində filialdan məhsul alaraq çatdırılmasını istəyib və ödənişi nağd şəkildə həyata keçirib.
Mağazadan müştəriyə məhsulun maksimum 10 gün ərzində çatdırılacağı bildirilsə də, qeyd olunan müddətdə sifariş təhvil verilməyib.
Vətəndaş iddia edir ki, 10 gün tamam olduqdan sonra mağaza ilə əlaqə saxlasa da, zənglərinə cavab verilməyib. Yalnız 11-ci gün telefon açılaraq məhsulun 15 gün ərzində çatdırılacağı bildirilib. Müştəri isə əvvəlcədən 10 gün deyilərək sonradan müddətin dəyişdirilməsinə etirazını bildirib.
Onun sözlərinə görə, 19-cu gün də məhsul çatdırılmayıb və heç bir məlumat verilməyib. Daha sonra şikayətçi sifarişini başqa məhsulla dəyişmək istədiyini bildirib. İşçilərdən biri ona filiala gəlməsini məsləhət görüb.
Şikayətçi 26 aprel tarixində yenidən mağazaya müraciət etdiyini, özünü administrator kimi təqdim edən əməkdaşa məhsulun gəlmədiyini və dəyişdirilməsini istədiyini deyib. Lakin ona məhsulun başqa şəxsə satıldığı və həmin gün ofisin işləmədiyi bildirilib.
Müştəri iddia edir ki, filial əməkdaşları məsuliyyətsiz davranıb, iş prosesindən xəbərsiz olublar və vətəndaşla düzgün ünsiyyət qura bilməyiblər. O, məsələnin həlli üçün aidiyyəti qurumlardan kömək istəyib.
Mövzu ilə bağlı qarşı tərəf mövqeyini bildirməyib.
