Şanlıurfa və Kahramanmaraşda baş verən faciəli hadisələrdən sonra Türkiyədə televiziya məzmunlarına nəzarət gücləndirilib.
Medialive.az xəbər verir ki, bu çərçivədə ölkədə yayımlanan serialların məzmunu yenidən yoxlanılmağa başlanılıb.
Məqsəd cəmiyyətə mənfi təsir göstərə biləcək səhnə və süjetlərin qarşısını almaqdır. Türk mediasında yayılan məlumatlara görə, hazırda bəzi layihələrlə bağlı ciddi müzakirələr aparılır. Xüsusilə “Eşref Rüya” və “Yeraltı” seriallarının yayımdan tamamilə çıxarıla biləcəyi iddia olunur. Hələlik məsələ ilə bağlı rəsmi qərar açıqlanmayıb. Lakin nəzarət prosesinin davam etdiyi və yaxın günlərdə bununla bağlı konkret addımların atılacağı gözlənilir.
Qeyd edək ki, hazırda Türkiyədə mafiya məzmunlu “Yeraltı”, “Eşref Rüya” serialları reytinqlərdə birincidir. Bundan başqa, yayımlanan digər seriallarda da (“Uzak şehir”, “Halef”, “Sevdiğim sensin”, “Çirkin”, “Güller ve günahlar”, “A.B.İ”, “Arka sokaklar”, “Teşkilat”, “Taşacak bu deniz”) böyük hissəsində silahlı atışma, zorakılıq səhnələri çoxluq təşkil edir.
