Son zamanlar baş tutan beynəlxalq tədbirlərdə Fransa Prezidenti Emmanuel Makronun Azərbaycan Prezidenti İlham Əliyevlə daha səmimi davranmağa çalışdığı müşahidə olunur.
Bu daha çox Azərbaycanın 44 günlük Vətən Müharibəsindəki qələbəsindən, eyni zamanda bu il Vaşinqtonda qəbul edilən sülh paraflanmasından sonra daha çox özünü biruzə verir.
Bütün bu prosesləri nəzərə alaraq, Azərbaycanla Fransa arasında konstruktiv münasibətlərin bərqarar olacağını deyə bilərikmi?
Görəsən, Fransa ölkəmizə yaxınlaşmaqla hansı məqsədləri güdə bilər?
Mövzu ilə bağlı AĞ Partiya başqanı Tural Abbaslı Medialive-yə açıqlama verib.
O, açıqlamasında bildirib ki, ölkə başçılarının beynəlxalq tədbirlərdə səmimi görüşüb-söhbətləşməsi münasibətlərin yaxşılaşmasına işarədir:
“Müasir dünyada prezidentlərin şəxsi münasibətləri bir çox hallarda dövlətlərarası münasibətləri də tənzimləyir. Buna görə ölkə başçılarının beynəlxalq tədbirlərdə bir-biri ilə səmimi görüşüb söhbətləşməsi münasibətlərin yaxşılaşmasına işarə kimi qəbul edilə bilər. Amma təbii ki, bu münasibətlərin yaxşılaşması özünü dövlətlərarası siyasətdə göstərməlidir. Yanlız tədbirdən-tədbirə görüşlər bunu həll etmir. Əsas məsələ bunun özünü necə biruzə verməsidir. Beynəlxalq təşkilatlarda Azərbaycan əleyhinə qərəzli mövqedə çıxış etməmək ölkəmizi dəstəkləmək kimi görünə bilər. Artıq Fransa da başa düşür ki, Ermənistan kimi bir dövlətin üzərindən Azərbaycan qədər güclü dövlətlə mübahisə etmək doğru deyil. Onsuz Azərbaycan Fransanın mövqeyindən asılı olmayaraq, Qarabağ məsələsini öz bildiyi istiqamətdə həll etdi. Azərbaycan bu məsələdə Türkiyə, Pakistan, nisbətən ABŞ kimi müttəfiqlərini yanına aldı”.
Partiya sədri qeyd edib ki, Fransa dalana çevrilmiş Ermənistana görə Azərbaycanla münasibətləri korlamayacaq:
“Fransa Ermənistanın yanında tək qalıb. Azərbaycan kimi strateji əhəmiyyətə malik dövlətlə münasibətlərin korlanmasını məqsədəuyğun hesab etmir. Gələcəkdə Fransanın maraqları Azərbaycandan keçə bilər. Çünki neft-qaz ehtiyatları ölkəmizdə kifayət qədərdir, eyni zamanda Orta Asiya qazının, neftinin Azərbaycan vasitəsilə Avropaya ixrac edilməsi, habelə yaşıl enerji məsələləri var ki, bunlar Fransanın maraq dairəsindədir. Bütün bu faktorları təhlil edəndə, Fransanın məntiqi o ola bilər ki, Azərbaycanla münasibətləri düzəltsin. Dalana çevrilmiş Ermənistana görə Azərbaycanla münasibətləri korlamasın”.
Mikayıl Mirzəzadə
