Naxçıvan Muxtar Respublikasında media və televiziyalara rəhbərlik Naxçıvan MR Ali Məclisin aparat rəhbərinin vəzifələrini icra edən şəxsə tapşırılıb.
Manset.az-ın əldə etdiyi məlumata görə, müvafiq qərarla Naxçıvan Muxtar Respublikasında fəaliyyət göstərən televiziya, radio və media qurumlarına rəhbərlik Ali Məclisin aparat rəhbərinin vəzifələrini icra edən Fazil Məmmədova həvalə edilib.
F. Məmmədov bununla bağlı bir neçə gün öncə Naxçıvan Televiziyasında iclas keçirib və ciddi tapşırıqlar verib. Yayılan xəbəri Fazil Məmmədov özü də saytımıza təsdiqləyib:
“Bəli, bir neçə gün öncə iclas keçirmişəm. Lazımi tapşırıqlar verilib. Ora ilə bağlı hər hansı bir sual olmamalıdır”, – deyə F. Məmmədov bildirib.
Qeyd edək ki, bundan əvvəl Naxçıvanda media sahəsinə rəhbərliyi Azərbaycan Prezidentinin Naxçıvan Muxtar Respublikası üzrə səlahiyyətli nümayəndəliyinin media sahəsi üzrə əməkdaşı, tanınmış jurnalist Günay Malikqızı həyata keçirirdi. Hazırda ona başqa vəzifə həvalə olunub.
Fotoda Fazil Məmmədov
