Məlumdur ki, fevralın 28-dən ABŞ, İsrail və İran arasında şiddətli döyüşlər gedir.
Bunun ardınca, münaqişəyə Ərəb ölkələri də qoşuldu.
Qərb ölkələrinin bir hissəsi birtərəflik nümayiş etdirir, bəziləri İrana qarşı əməliyyatlara qoşulacağını bildirir, bir hissəsi isə ABŞ-yə hərbi bazalarını bağlayıb.
Çin isə İrana dəstək göstərərək, bu ölkəyə xeyli silah-sursat göndərib.
Rusiyanın isə başı Ukraynaya qarışdığı üçün okeanın o biri tayındakı Amerikaya və ümumiyyətlə münaqişəyə baş qoşmur.
Beləliklə, yaxın zamanda digər ölkələrin də müharibəyə qoşulacağı istisna edilmir.
Bütün bunların fonunda hətta belə fikirlər də yaranıb ki, artıq dünya Üçüncü Dünya Müharibəsinə gedən yolun astanasındadır.
Bəs, sözügedən münaqişə yaxın perspektivdə nələrə gətirib çıxaracaq? Nəticə etibarilə, dünya düzəni dəyişəcəkmi?
Məsələ ilə bağlı AĞ Partiya sözçüsü, siyasi şərhçi Cavanşir Abbaslı Medialive.az-a açıqlama verib.
O, açıqlamasında bildirib ki, müharibələrin ən xarakterik xüsusiyyəti odur ki, rəqibin hərbi bazaları hədəfə alınaraq vurulsun:
“Bu müharibənin Ərəb ölkələrinə də sıçrayacağı gözlənilən idi. Çünki bu ölkələrdə Amerikanın hərbi bazaları yerləşir. Bütün müharibələrin də xarakterik xüsusiyyətidir ki, rəqibin bu bazalarını hədəf alsın. Bu arada qeyd edək ki, Azərbaycan tərəfinin necə düzgün siyasət yürüdüb ərazisində heç bir ölkənin hərbi bazasının yerləşməsinə izn verməməsinin nə qədər doğru olduğu bir daha sübut olundu. Əks təqdirdə daim biz də hədəflərdən biri ola bilərdik”.
Siyasi şərhçi hesab edir ki, bu münaqişə Dünya Müharibəsinə gətirib çıxarmayacaq:
“Hesab edirəm ki, cənub qonşumuzun hücumları davam edəcək. Amma bunun daha genişmiqyaslı olub, III dünya müharibəsinə qədər gətirib çıxaracağını düşünmürəm. Lakin savaş bir neçə gün də davam edəcək. Yeni ölkələr qoşula bilər, amma bunun əksəriyyət təşkil edəcəyi real görünmür. Xüsusilə, bölgə ölkələri bu prosesdə iştirakçı meydanında deyil, diplomatik təmaslarda yer alacaqlar. Müharibə də ən geci Novruza qədər bitəcək. İranın bu vaxtadək ən sərt zərbələrinin şahidi olacağıqmı? Düşünürəm ki, bu mümkündür. Çünki Xameneinin öldürülməsini nə iləsə kompensasiya etməlidirlər və İran xalqında təskinlik yaratmalıdırlar”.
Leyla Cəfərova
