Çin TikTok platformasına sahiblik məsələsinin həllində ABŞ-ilə əməkdaşlıq etmək niyyətindədir.
Medialive xəbər verir ki, nu barədə Cənubi Koreyanın Busan şəhərində Çin sədri Si Cinpin və ABŞ Prezidenti Donald Tramp arasında keçirilən danışıqların yekunları üzrə Çinin Ticarət Nazirliyi məlumat yayıb.
“Tərəflər, ABŞ-nin investisiya kimi sahələrdə müsbət öhdəliklər götürməsi və Çinin TikTok problemini lazımi şəkildə həll etmək üçün ABŞ-ilə işləməyə razı olması ilə Madrid ticarət məsləhətləşmələrinin nəticələrini təsdiqləyib”, – departamentin saytında deyilir.
Sentyabrın 25-də Tramp Çin sosial media platforması TikTok-un ABŞ-dəki əməliyyatlarının Amerika biznesi tərəfindən idarə edilməsinə dair müqaviləni təsdiqləyən sərəncam imzalayıb.
Sərəncama əsasən, yeni qurumun əsas payı və nəzarəti Amerika vətəndaşlarına məxsus olacaq. Çin şirkəti ByteDance 20%-dən az pay alacaq, qalan hissəsi isə müəyyən investorlara məxsusdur. Konkret investorlar göstərilməyib. Şirkət amerikalıların məlumatlarının lazımi şəkildə qorunmasını və ABŞ-ın təhlükəsizliyini təmin edəcək qaydalara uyğun olaraq yeni direktorlar şurası tərəfindən idarə olunacaq. Yeni şirkətin dəyəri təxminən 14 milyard dollar olacaq.
Məlumata görə, Tramp platformaya rəğbətini ifadə etmişdi, çünki istifadəçilərinin səsləri onun prezident seçkilərində qələbə qazanmasına kömək etdi. 20 yanvar 2025-ci ildə andiçmə mərasimindən sonra o, platformanın ABŞ-də bloklanmasını təxirə salan sərəncam imzaladı. Daha sonra o, bu möhlət müddətini bir neçə dəfə, ən son isə sentyabrın 16-da uzadıb. ABŞ-da sosial şəbəkənin bloklanması dekabrın 16-dək təxirə salınıb.
