“Düşünürəm ki, hazırkı situasiyada Ermənistan xalqı üçün ən uyğun seçim Paşinyandır. Çünki onun bir sıra addımları Ermənistanın Türkiyə və Azərbaycanın yanında yer alması üçün cəhd etdiyinin göstəricisidir. Biz hər zaman deyirdik ki, Ermənistan üçün ən doğru yol Azərbaycanın təkliflərini qəbul etmək, ölkəmizin yanında yer almaqdır. Paşinyan devrilərsə, hər hansı radikal müxalifət rəhbəri hakimiyyətə gələrsə, bu proses Azərbaycanı narahat etməyəcək”.
Bu fikirləri Medialive.az-a açıqlamasında Müasir İnkişaf İctimai Birliyinin sədri, siyasi şərhçi Mübariz Göyüşlü Ermənistanda hakimiyyətə radikal müxalifətin gələcəyi təqdirdə, Azərbaycanla sülh müqaviləsinin imzalanmasına mane olub-olmaması barədə danışarkən deyib.
O qeyd edib ki, Ermənistanda hakimiyyətə kimlərin gəlməsindən asılı olmayaraq, Azərbaycana qarşı hansısa çirkin və ya neqativ addımların atılması mümkünsüzdür:
“Bundan sonra kimin hakimiyyətə gəlməsindən asılı olmayaraq Azərbaycana qarşı hansısa çirkin və ya neqativ addımların atılması mümkünsüzdür. Bunu Ermənistanda çox gözəl anlayırlar. Dövr o dövr deyil. Radikal müxalifət hakimiyyətə gəlsə, sülh müqaviləsi ilə bağlı prosesi dondura, ləngidə və ya süni cəhdlərlə uzada bilərlər. Biz isə buna yalnız təəssüflənərik. Lakin bu məsələdə Ermənistan daha çox itirəcək. O ki qaldı, hökumətin Qərb və Rusiyaya meylli siyasət yürütməsi məsələsinə. Balansı pozaraq xarici siyasət yürütmək, addımlar atmaq Cənubi Qafqazda müəyyən gərginliyə çıxara bilər. Amma, bunun böyük miqyasda Cənubi Qafqazda çox ciddi problemlər yarada biləcəyinə inanmıram. Çünki regionda güclü və qüdrətli Azərbaycan dövləti var. Ölkəmiz bu proseslərə ciddi nəzarət edir, eyni zamanda Cənubi Qafqaza cavabdeh dövlətdir. Bu baxımdan bir çox neqativ situasiyalara imkan vermərik”.
