Moskvanın Tverskoy Məhkəməsi feminist pan-rok qrupu “Pussy Riot”u ekstremist təşkilat elan edib və Rusiyada fəaliyyətini məhdudlaşdırıb.
Medialive xəbər verir ki, iddia Rusiya Baş Prokurorluğu tərəfindən qaldırılıb.
2025-ci ilin sentyabrında Moskvanın Basmannı Məhkəməsi sözügedən qrupun beş üzvünü Rusiya ordusu haqqında saxta xəbərlər yaymaq ittihamı ilə 8 ildən 13 ilə qədər həbs cəzasına məhkum edib.
Mariya Alyoxina 13 il, Taso Pletner 11 il, Olqa Borisova, Diana Burkot və Alina Petrova isə 8 il həbs edilib.
“Pussy Riot” qrupunun cinayət təqibi onların müharibə əleyhinə “Mama, Don’t Watch TV” adlı musiqi videosundan və ötən il aprelin 18-də Münhendəki Pinakothek der Moderne-də baş tutan çıxışından qaynaqlanıb.
Tamaşa zamanı “Pussy Riot” üzvləri Rusiyanın Ukraynaya tammiqyaslı işğalını tənqid edən şüarlar səsləndirib və Putini cinayətkar adlandırıblar. Ən qəbuledilməz hərəkət isə tamaşa zamanı qrupun bir üzvünün Putinin portretinə sidik etməsi olub.
