Almaniya kansleri Fridrix Merz Macarıstanın baş naziri Viktor Orbanın Avropa mandatı olmadan Moskvaya getdiyini iddia edib.
Medialive xəbər verir ki, o, bu barədə Berlində Sloveniyanın baş naziri Robert Qolobla birgə mətbuat konfransında danışıb.
“Viktor Orbanın mövqeyi bizə çoxdan məlumdur. Bu, onun Moskvaya ilk səfəri deyil”, – deyən Merz Macarıstanın baş nazirinin 2024-cü ildə ölkənin Avropa Şurasına sədrliyi dövründə artıq Moskvaya səfər etdiyini xatırladıb.
“O, ora Avropa mandatı və ya bizim icazəmiz olmadan gedir. Ancaq burada yeni bir şey yoxdur; onun bu müharibəni bitirmək barədə öz fikirləri var – deyə Merz deyib.
O, bu ideyaların hələ reallaşmadığını açıqlayıb.
“Əgər kiminsə bizdən daha yaxşı ideyaları varsa, bunu alqışlamaq lazımdır, lakin mən bunun ötən dəfəkindən daha uğurlu olacağına şübhə edirəm” – deyə kansler əlavə edib.
Qeyd edək ki, bu gün Kremldə Rusiya Prezidenti Vladimir Putinlə danışıqlar zamanı Viktor Orban bəyan edib ki, Macarıstan suveren xarici siyasət yürüdür və Rusiya ilə əməkdaşlıq etdiyinə görə xarici təzyiqlərə boyun əymir.
