Gənc aktyor Niftalı Namazlı sənət yolunda qarşılaşdığı çətinliklərdən, aktyorluq sahəsində yaşanan görünməyən məqamlardan və şəxsi prinsiplərindən danışıb.
Aktyor bununla bağlı Yeniera.az-a müsahibə verib.
– Niftalı bəy, sənət yolunuzun heç də asan keçmədiyini deyirsiniz. Ən böyük çətinliklər nələr olub?
– Bu sənətdə hər şey göründüyü kimi deyil. Mən bunları sadəcə eşitməmişəm, yaşamışam. Yolum heç vaxt rahat olmayıb. Çünki mən asan yolu seçmədim.
– Heç haqqınız olan obrazın əlinizdən alındığı olub?
– Bəli, dəfələrlə olub. Elə anlar yaşanıb ki, hazır olduğum, üzərində çalışdığım rol son anda başqasına verilib. Səbəblər isə çox vaxt açıqlanmayıb.
– Sənət cameəsində təzyiqlərlə qarşılaşdığınızı düşünürsünüz?
– Bəzən açıq, bəzən dolayı şəkildə bunu hiss etmişəm. “Öz yerini bil”, “müəyyən çərçivəni keçmə” kimi mesajlar bu sahədə yad deyil. Amma mən o çərçivələrə sığan insan deyiləm.
– Sizcə, bu sahədə istedad hər zaman ön planda olur?
– Təəssüf ki, yox. Bunu demək çətindir, amma həqiqətdir. Bəzən başqa amillər daha tez yol açır. Mən isə o yolu seçmədim.
– Bütün bunlara baxmayaraq, geri çəkilməyi düşünmüsünüz?
– Heç vaxt. Mən geri çəkilməyi yox, daha da güclənməyi seçdim. Məni dayandırmaq istəyənlər çox oldu, amma bacarmadılar.
– Hazırda özünüzü sənətdə hansı mərhələdə görürsünüz?
– Mən sadəcə davam etmirəm, gəlirəm. Və bu dəfə məni görməmək mümkün olmayacaq.
YENİERA.AZ
