Qəzzada İsrailin blokadasını yarmaq və humanitar yardım çatdırmaq üçün gedən avstraliyalı fəal Robert Martin İslamı qəbul edib.
Medialive xəbər verir ki, Martin bu barədə qərarını sosial şəbəkədə açıqlayıb.
“Müsəlman olmağa qərar verdim. Və qərarımda qətiyəm”, – deyə o, yazıb.
Martin bu illər ərzində Fələstinlə bağlı həqiqətləri öyrəndiyini və bu prosesdə İslam haqqında yanlış məlumat aldığını bildirib.
O, 2016-cı ildə etdiyi bir mütaliənin həyatında böyük bir dəyişikliyin başlanğıcı olduğunu bildirib.
Fələstinə etdiyi səfərlərin beynindəki ön mühakimələri darmadağın etdiyini deyən fəal uzun müddətdir ki, İslam və müsəlmanlar haqqında yanlış məlumatlara inanıb və cahilliyinə görə utandığını açıqlayıb.
Qeyd edək ki, Qlobal Sumud Donanması soyqırım və işğal altında humanitar faciənin yaşandığı Qəzzaya 2023-cü ilin oktyabrdan İsrailin tətbiq etdiyi blokadanı yarmağı hədəfləyən müxtəlif ölkələrdən fəalların iştirakı ilə formalaşan sivil təşəbbüs kimi tanınır.
Donanma 31 avqustda İspaniyanın Barselona limanından yola düşərək Qəzzaya doğru dəniz səyahətinə başlayıb.
Sonradan donanmanın bəzi gəmiləri 13-15 sentyabr tarixlərində Bizerte limanından və digər Tunis limanlarından hərəkət edərək Şərqi Aralıq dənizində birləşdi. Fələstin sahillərinə çatmazdan əvvəl donanma beynəlxalq sularda İsrail qayıqları və gəmiləri tərəfindən tutulub. İsrail qüvvələri tərəfindən saxlanılan fəallar ölkələrinə geri göndərilib.
