Bu gün ölkə ərazisində müşahidə olunan qarlı və şaxtalı hava şəraiti gündəlik həyatın bir sıra sahələrində çətinliklər yaratsa da, dövlət qurumlarının, xüsusilə də Azərbaycan polisinin operativ və məsuliyyətli fəaliyyəti diqqətdən yayınmır. Yol hərəkətinin təhlükəsizliyinin təmin edilməsi, piyadalara və sürücülərə kömək göstərilməsi istiqamətində həyata keçirilən tədbirlər vətəndaş məmnunluğunu artırır.
Güclü qar yağmasına baxmayaraq, polis əməkdaşları küçə və prospektlərdə fasiləsiz xidmət aparır, yolda qalan avtomobillərə yardım edir, piyadaların təhlükəsizliyini təmin edir və ümumi asayişin qorunması üçün əlindən gələni əsirgəmir. Bu mənzərə polis-vətəndaş münasibətlərinin real və səmimi təzahürüdür. Bu gün mən bunu yalnız eşitmədim, öz gözlərimlə gördüm. Azərbaycan polisi qarlı havada da vətəndaşın yanındadır, xidmətini vicdanla yerinə yetirir.
Xüsusilə qış mövsümündə, intensiv qar yağması zamanı polis əməkdaşları gücləndirilmiş iş rejimində fəaliyyət göstərir. Onların əsas məqsədi yol-nəqliyyat hadisələrinin qarşısının alınması, fövqəladə halların vaxtında nəzarətə götürülməsi və əhalinin təhlükəsizliyinin təmin edilməsidir.
Müşahidələr göstərir ki, bu cür hava şəraitində dövlət-vətəndaş münasibətlərində etimad daha da möhkəmlənir. Azərbaycan polisinin operativliyi və humanist yanaşması cəmiyyət tərəfindən təqdirlə qarşılanır və bu xidmət xalqın dövlətinə olan inamını daha da gücləndirir.
Qarlı günlər bir daha sübut edir ki, Azərbaycan polisi yalnız qanunun keşikçisi deyil, eyni zamanda çətin anlarda vətəndaşın dayağıdır.
Mikayıl Mirzəzadə
Medialive.az informasiya portalının rəhbəri
