ABŞ Boliviyanın 2023-cü ildə İsrail ilə kəsilmiş diplomatik münasibətlərinin yenidən bərpa etmək qərarını alqışlayır.
Medialive xəbər verir ki, bu barədə ABŞ dövlət katibi Marko Rubio bildirib.
Dövlət katibi bu haqda X-də yazıb.
“Boliviya İsrail ilə diplomatik münasibətləri bərpa etmək üçün tarixi bir qərar verib. Boliviya yeni bir dövrə qədəm qoyarkən, ABŞ qarşıda parlaq bir gələcək görür”.
Bundan əvvəl ABŞ dövlət katibinin müavini Kristofer Landau Boliviyanın yeni hökumətinin xarici işlər naziri Fernando Aramayo ilə görüşmüş və Vaşinqtonun əməkdaşlığı genişləndirməyə və ölkənin iqtisadi inkişafına kömək etməyə hazır olduğunu vurğulayıb.
Qeyd edək ki, Boliviya İsrailin Qəzzadakı hərəkətlərinə görə 2023-cü ilin oktyabrında İsrail ilə münasibətləri kəsib.
Oktyabrın 19-da Boliviyada prezident seçkilərinin ikinci turu keçirilib və Rodrigo Paz qalib gəlib.
O, 8 noyabrda vəzifəsinin icrasına başlayıb. Seçki kampaniyası zamanı o, ölkənin dünya ilə əlaqələrini gücləndirməyin vacibliyindən danışıb, 2008-ci ildə kəsilmiş ABŞ ilə münasibətlərin bərpasının və regional əməkdaşlığın inkişaf etdirilməsinin vacibliyini vurğulayıb.
