Bir neçə gündür ki, Azərbaycan Respublikası Səhiyyə Nazirliyinin “Plastik cərrahiyyə ixtisası üzrə praktik tibb fəaliyyəti ilə məşğul olmağa dair bəzi məsələlər haqqında” 16 aprel 2025-ci il tarixli əmri ilə sertifikatı ləğv edilmiş həkim Mübariz Məmmədlinin barəsində mətbuatda müxtəlif məzmunlu yazılar dərc olunur.
Bır sıra informasiyada sözügedən qərarın plastik cərrah M.Məmmədliyə aid bəndinin ləğv edilməsi barədə iddia ərizəsinin rədd edilməsi göstərilir, digər yazılarda isə məhkəmə prosesinin hazırlıq mərhələsində olması və davam etməsi göstərilir.
Bu gün Bakı İnzibati Məhkəməsində növbəti məhkəmə iclası keçirilib.
Medialive.az-ın əldə etdiyi məlumata görə, məhkəmə prosesi hakim Aydın Babayevin sədrliyi ilə keçirilib.
İclas hazırlıq mərhələsində Səhiyyə Nazirliyinin nümayəndəsinin iştirakı olmadan davam edərək hakim tərəfindən avqust ayının 21-nə saat 10:00-a baxış iclası təyin edildiyi elan olunub, eyni zamanda məhkəmədə maraqlı faktlar müzakirə edilib.
Belə ki, həkimin vəkilləri məhkəmə iclasında onların təmin olunmuş vəsatətləri əsasında Səhiyyə Nazirliyinə məhkəmə tərəfindən bir sıra sorğular verilsə də inzibati icraat materiallarının təqdim edilməməsi, sertifikatları ləğv edən komissiyanın tərkibində məmurların olması faktı da vurğulanıb.
Məhkəmə iclası uzun çəkməyib. İclasda jurnalistlər də iştirak edib.
Mövzu ilə bağlı araşdırmalarımız davam edir.
