Məlum olduğu kimi, əmək pensiyalarının orta aylıq məbləğinin gələn il üçün 590 manat olacağı proqnozlaşdırılır.
Bunu bu gün Milli Məclisin Əmək və sosial siyasət və İqtisadi siyasət, sənaye və sahibkarlıq komitələrinin birgə iclasında “Azərbaycan Respublikasının 2026-cı il dövlət büdcəsinin zərfi”nin müzakirəsində Əmək və sosial siyasət komitəsinin sədri Musa Quliyev deyib.
Eyni zamanda, yaşa görə pensiyanın orta aylıq məbləğinin cari ildəki 576 manatdan 53 manat artırılaraq 629 manata yüksəldilməsi da ehtimal edilir.
Bəs, bu artım neçə min insana şamil ediləcək və reallığı əks etdirirmi?
Məsələ ilə bağlı Milli Məclisin deputatı, iqtisadçı Vüqar Bayramov Medialive.az-a açıqlama verib.
O bildirib ki, 2026-cı ilin yanvar ayından əmək pensiyalarının 9-12% artacağı gözlənilir:
“Gələn ildən əmək pensiyalarında artımlar nəzərdə tutulur. Belə ki, növbəti ilin yanvar ayından etibarən əmək pensiyalarının 9-12% artacağı gözlənilir. Əmək pensiyaları haqqında qanuna əsasən, bütün növ əmək pensiyaları məhz növbəti il əvvəlki ildə orta aylıq əməkhaqqının artım faizinə uyğun indeksləşdirilərək artırılıb. 2025-ci ilin ilk 9 ayında orta aylıq əməkhaqqı 9.7 faiz artırılıb. Təbii ki, aylar üzrə rəqəmlər dəyişir və gözlənti ondan ibarətdir ki, illik artım faizi 9.2 faiz olacaq. Bu o deməkdir ki, bütün növ əmək pensiyaları növbəti ildən etibarən 9.2 faizə indeksləşdirilib artırılacaq”.
Deputat qeyd edib ki, sözügedən artım 1 milyon 100 min vətəndaşı əhatə edəcək:
“Bu artım 1 milyon 100 min vətəndaşımızı əhatə edəcək. Vətəndaşlarımızın pensiyalarında artım qeydə alınacaq. Eyni zamanda artımlar bütün növ əmək pensiyası alan vətəndaşlarımıza da şamil olunacaq. Söhbət həm yaşa görə əmək pensiyası alan, həm əlilliyə görə əmək pensiyası alan və eyni zamanda ailə başçısını itirməyə görə əmək pensiyası alan vətəndaşlarımızdan gedir”.
Mikayıl Mirzəzadə
