Fransa 6 fevral tarixində Qrenlandiyada ilk konsulluğunu açacağını elan edib.
Medialive.az xəbər verir ki, bu barədə Fransanın xarici işlər naziri Jan-Noel Barro “Politico”ya açıqlamasında bildirib.
Barro ofisin adanın paytaxtı Nuuk şəhərində açılmasını ABŞ prezidenti Donald Trampın Qrenlandiya ilə bağlı planlarına cavab olaraq “siyasi siqnal” adlandırıb.
“Bloomberg” agentliyi isə xəbər verib ki, Danimarka və Qrenlandiyanın xarici işlər nazirləri ABŞ-ın vitse-prezidenti J.D. Vance və dövlət katibi Marko Rubio ilə görüşəcək. Səfərin əsas məqsədi Vaşinqtonu adanı ələ keçirmək planlarından çəkindirməkdir.
Yanvarın 13-də Qrenlandiyanın Baş naziri Yens-Frederik Nilsen bildirib ki, ada ABŞ-ın bir hissəsi olmayacaq və Vaşinqton tərəfindən idarə edilməyəcək.
