Latviya hökuməti 2026-cı ildə müdafiə xərclərinə 2 milyard avrodan çox vəsait ayıracaq. Bu məbləğ ölkə tarixində rekord göstərici olacaq.
Medialive xəbər verir ki, bunu Latviyanın müdafiə naziri Andris Spruds bildirib.
“Bu, ÜDM-in 4,91%-ni təşkil edir. Bu, 2 milyard avrodan artıqdır”, – deyə Spruds bildirib və əlavə edib ki, Latviya hökuməti ilk dəfə müdafiəyə 2 milyard avro ayırır.
Qeyd edilib ki, respublika hakimiyyəti ayrılan büdcənin təxminən 53%-ni ordunun imkanlarının inkişafına sərf etməyi planlaşdırır. Qalan vəsaitin hərbi xidmətə və infrastruktura xərclənəcəyi bildirilir.
Latviya hakimiyyət orqanlarının 2026-cı ildə bir neçə iri müdafiə layihəsini həyata keçirəcəyi gözlənilir. Bunlara döyüş maşınları və hava hücumundan müdafiə sistemlərinin alınması, eləcə də sursat ehtiyatlarının artırılması daxildir.
Qeyd edək ki, fevralda Latviyanın müdafiə naziri hökumətin müdafiə xərcləri üçün minimum səviyyəni müəyyən edən qərarı təsdiqlədiyini elan edib.
İyunda Haaqada keçirilən sammitdə NATO liderləri ABŞ-nin təşəbbüsü ilə müdafiə xərclərini ÜDM-in 5%-ə çatdırmaq barədə razılığa gəliblər.
