Donald Trampın kürəkəni Cared Kuşnerin Belqradda Baş Qərargah binasının yerindəki Tramp otelinin layihəsini ləğv etməsi səbəbindən Serbiya 750 milyon avro investisiya itirib.
Medialive xəbər verir ki, bu barədə Serbiya Prezidenti Aleksandr Vuçiç danışıb.
Dövlət başçısı xalqa müraciətində bildirib ki, bu, dövlət üçün çox böyük itkidir:
“Təəssüf ki, dövlət və xalq üçün böyük itkilər verdik. Ən azı 750 milyon avro itirdik ki, bu da böyük bir sərmayədir”.
Qeyd edək ki, dekabrın 15-də Serbiya Prokurorluğu Mütəşəkkil Cinayətkarlıqla Mübarizə İdarəsi Selakoviçə və digər üç məmura qarşı Baş Qərargah binalarını mədəni irs statusundan məhrum etməkdə qanunsuz hərəkətlərə görə ittiham irəli sürüb. Amerika mediası daha sonra Kuşnerin Belqrad layihəsindən imtina etdiyini bildirib.
Bu ilin əvvəlində Belqradda 1999-cu ildə NATO-nun bombardmanı zamanı dağıdılmış keçmiş Baş Qərargah binasının yenidən qurulmasına qarşı etiraz aksiyaları keçirilib.
İştirakçılar binanın statusunun dəyişdirilməsinin və sonrakı yenidən qurulmasının tarixi yaddaşın itirilməsinə və konstitusiya və hüquqi normaların pozulmasına səbəb olacağını iddia ediblər.
