Hantavirus əsasən yoluxmuş gəmiricilərin sidiyi, nəcisi və tüpürcəyi ilə təmas nəticəsində insanlara keçir.
Medialive.az xəbər verir ki, virus ən çox havaya qalxan toz hissəciklərinin nəfəs yolu ilə qəbul edilməsi zamanı yoluxur. Köhnə anbarlar, kənd evləri, zirzəmilər və uzun müddət bağlı qalan məkanlar riskli sayılır. Bəzi hallarda gəmirici dişləməsi də yoluxmaya səbəb ola bilər.
Xəstəliyin ilkin simptomları qripə bənzəyir. Yüksək hərarət, əzələ ağrıları, halsızlıq, baş ağrısı və ürəkbulanma ilk əlamətlər arasında olur. Daha ağır hallarda isə ağciyərlərdə maye toplanması, nəfəs darlığı və böyrək çatışmazlığı inkişaf edə bilər.
Həkimlər bildirirlər ki, erkən diaqnoz həyati əhəmiyyət daşıyır.
Hazırda hantavirusa qarşı xüsusi təsdiqlənmiş peyvənd və ya tam effektiv antiviral müalicə yoxdur. Müalicə əsasən simptomların yüngülləşdirilməsinə və xəstənin vəziyyətinin stabilləşdirilməsinə yönəlir.
Mütəxəssislər hesab edir ki, hantavirus hazırda COVID-19 səviyyəsində qlobal təhlükə yaratmasa da, iqlim dəyişiklikləri və gəmirici populyasiyasının artması gələcəkdə riski yüksəldə bilər. Xüsusilə kənd təsərrüfatı və meşəlik ərazilərdə çalışan insanlar daha diqqətli olmalıdır. /Metbuat.az/
