Moldovanın müxalif Kommunist Partiyası və Sosialist Partiyası Prezident Maya Sandunu ölkəni Rumıniyaya birləşdirilməsinə görə xəyanətkar adlandırıb.
Medialive xəbər verir ki, bu barədə Sosialist Partiyasının veb saytında bəyanat dərc edilib.
“Biz Baş Prokurorluqdan, İnformasiya və Təhlükəsizlik Xidmətindən və bütün səlahiyyətli orqanlardan mümkün xəyanətlə bağlı dərhal araşdırma başlatmağı tələb edirik, çünki dövlət başçısının ölkənin dağılması ilə bağlı ictimai çağırışları ən sərt hüquqi və siyasi yoxlamaya məruz qalır”, – deyə bəyanatda qeyd olunub.
Kommunist Partiyası qeyd edib ki, Maya Sandunun açıqlamaları konstitusiyada təsbit olunmuş səlahiyyətlərdən çox kənara çıxıb.
“Əsas Qanunda açıq şəkildə bildirilir ki, prezident Moldova Respublikasının müstəqilliyinin və ərazi bütövlüyünün qarantıdır. Bu baxımdan, yeganə ədalətli və düzgün həll yolu Maya Sandunun Moldova xalqının iradəsi ilə prezidentlik səlahiyyətlərindən məhrum edilməsi və ardınca konstitusiyanı pozduğuna görə cinayət məsuliyyətinə cəlb edilməsi olardı”, – kommunistlərin bəyanatında deyilir.
Qeyd edək ki, Kommunist Partiyası və Sosialist Partiyası fraksiyaları parlamentin 101 üzvündən 25 faizini təşkil edir. Konstitusiyaya görə, Moldova Prezidenti üçdə iki səs çoxluğu ilə vəzifəsindən uzaqlaşdırıla bilər. İmpiçment proseduruna başlamaq üçün parlament üzvlərinin ən azı üçdə biri səs verməlidir.
Xatırladaq ki, Sandu öncədən referendumda Moldovanın Rumıniya ilə birləşməsini dəstəkləyəcəyini bildirmişdi.
