ABŞ dövlət katibi Marko Rubio 2026-cı il Dünya Çempionatına alınan biletlərin azarkeşlərin Amerikaya giriş vizalarına zəmanət verməyəcəyini açıqlayıb.
Medialive Qərb mediasına istinadən xəbər verir ki, bu barədə Rubio hökumətin Dünya Çempionatına hazırlıqdan məsul işçi qrupunun iclasında çıxışı zamanı danışıb.
Rubio bildirib ki, biletin olması ABŞ konsulluğunda viza müsahibənizi sürətləndirməyə kömək edəcək.
“Ərizəçilər və ABŞ vizalarına müraciət edən digər əcnəbilər arasında yeganə fərq odur ki, biz sizi ön sıraya qoyacağıq” – deyə Rubo qeyd edib.
Rubio Dünya Kubokunda iştirak etmək istəyənləri tez bir zamanda ABŞ vizasına müraciət etməyə çağırıb. O, müsahibələrin müraciətdən sonra altı-səkkiz həftə keçiriləcəyini bildirib.
Qeyd edək ki, 2026-cı il dünya çempionatı ABŞ, Meksika və Kanadada iyunun 11-dən iyulun 19-dək keçiriləcək.
